ဖေဖော်ဝါရီ ၁၁ – ၂၀၂၆
SS (VOM)
ပြည်ပကို တရားဝင် အလုပ်သွားရောက် လုပ်ကိုင်မယ့် အလုပ်သမားတွေအနေနဲ့ OWIC (အလုပ်သမား သက်သေခံကတ်) ဖိုးငွေနဲ့ ပျောက်ဆုံး/ပျက်စီး ဒဏ်ကြေးကို မတ်လ ၁ ရက်နေ့ကစပြီး မြန်မာ့စီးပွားရေးဘဏ်ကနေ ပေးသွင်းရမှာ ဖြစ်တယ်လို့ အလုပ်သမားဝန်ကြီးဌာနက မနေ့ ဖေဖော်ဝါရီ ၁၀ ရက်နေ့မှာ အသိပေး ကြေညာထားပါတယ်။
OWIC ကတ် ပြုလုပ်ခွင့်ရရှိကြောင်း ကြေညာခြင်းခံရတဲ့ အလုပ်သမားတွေအနေနဲ့ လာမယ့် မတ်လ ၁ ရက်ကစပြီး OWIC ကတ်ဖိုး ၅၆၀၀ ကျပ်နဲ့ ပျောက်ဆုံး/ပျက်စီးပါက ဒဏ်ကြေးအဖြစ် နှစ်သောင်းနှစ်ထောင့် လေးရာကျပ်ကို မြန်မာ့စီးပွားရေး ဘဏ်ခွဲတွေကတဆင့် နေပြည်တော် မြန်မာ့စီးပွားရေးဘဏ်မှာ ဖွင့်လှစ်ထားတဲ့ “ပြည်ပတွင် အလုပ်လုပ်ကိုင်မှု ကြီးကြပ်ရေးကော်မတီ” ရဲ့ ငွေစာရင်းအမှတ် OA-013904 ကို အလုပ်သမားကိုယ်တိုင် ငွေလွှဲ လျှောက်လွှာနဲ့ ပေးသွင်းရမှာ ဖြစ်တယ်လို့ သိရပါတယ်။
OWIC ကတ်ဖိုးငွေတွေကို OA-013904 ကို ပေးသွင်းပြီးပါက ငွေပေးသွင်းခဲ့တဲ့ ငွေလွှဲလျှောက်လွှာ (မူရင်း) နဲ့အတူ မိတ္တူတစောင်ကို ယူဆောင်ပြီး OWIC ကတ် ပြုလုပ်ရမယ့်နေ့ရက်မှာ အလုပ်သမားညွှန်ကြားရေး ဦးစီးဌာန၊ ကျွမ်းကျင်မှုလေ့ကျင့်ရေး သင်တန်းကျောင်း (မြောက်ဒဂုံ) က OWIC ကတ် ထုတ်ပေးရေးစင်တာကို သွားရောက်ဆက်သွယ် ဆောင်ရွက်ရမှာ ဖြစ်တယ်လို့ သိရပါတယ်။
ငွေစာရင်းအမှတ် မှားယွင်းပေးသွင်းခြင်း၊ ငွေလွှဲလျှောက်လွှာ မမှန်ကန်ခြင်း၊ ငွေလွှဲလျှောက်လွှာ (မူရင်း) ပြသနိုင်ခြင်းမရှိပါက OWIC ကတ်ကို ထုတ်ပေးမှာ မဟုတ်ဘူးလို့ အလုပ်သမားဝန်ကြီးဌာနက ထုတ်ပြန်ထားပါတယ်။
ဒါနဲ့ပတ်သက်လို့ ပြည်ပအလုပ်အကိုင် အေဂျင်စီ အကျိုးဆောင်တယောက်က “OWIC ကတ် မရှိရင် ပြည်ပ ပြန်ထွက်လို့မရဘူး၊ ကတ်ထုတ်ပေးချိန်ကလည်း ကြာလာတယ်ဆိုတဲ့ အခြေအနေမှာ ဝေဖန်သံတွေ ဆူညံလာတော့ အခုတခါ ဝန်ကြီးဌာနဘက်က နောက်တမျိုး ထပ်ထုတ်ပြန်လာတာပေါ့။ ဒါပေမယ့် ဒီထုတ်ပြန်ချက်ထဲမှာလည်း ကန့်သတ်ချက်တွေက ပါလာပြန်တယ်။ ငွေစာရင်းအမှတ် မှားတာတို့၊ လျှောက်လွှာ (မူရင်း) မပြနိုင်တာတို့ဆို မရဘူး ပြောထားပြန်တယ်။ အဲဒီတော့ ဌာနဆိုင်ရာဘက်က လွယ်ကူအောင် လုပ်ပေးနေပါတယ် ဘယ်လိုပဲပြောပြော၊ အခက်အခဲတွေကတော့ တနည်းမဟုတ် တနည်း ရှိနေဦးမယ်လို့ ယူဆရပါတယ်” လို့ ပြောပါတယ်။
ပြီးခဲ့တဲ့ လပိုင်းအတွင်း အကြောင်းအမျိုးမျိုးကြောင့် ပြည်ပကနေ ပြည်တွင်းကို ပြန်လာခဲ့ရတဲ့ အလုပ်သမားတွေကို လေဆိပ်အထွက်မှာ OWIC ကတ်မရှိရင် ထွက်ခွင့်မပြုဘူးဆိုပြီး တင်းကျပ်ခဲ့တာကြောင့် ပြည်ပကို ပြန်ထွက်လို့မရတဲ့ အခြေအနေတွေ ဖြစ်ပေါ်ခဲ့တယ်လို့ သိရပါတယ်။
အရင်က ပြည်ပရောက် အလုပ်သမားတွေ နိုင်ငံကူးလက်မှတ်အသစ် ပြုလုပ်တဲ့အချိန်မှာ OWIC ကတ်ကိုပါ သံရုံးတွေက တပါတည်း ထုတ်ပေးလေ့ရှိခဲ့ပေမယ့် ၂၀၂၅ ခုနှစ် အစပိုင်းမှာတော့ ယာယီရပ်ဆိုင်းထားခဲ့တာ ဖြစ်ပါတယ်။
အလုပ်သမား ဝန်ကြီးဌာနအနေနဲ့ OWIC ကတ် အသစ်တွေကို ၂၀၂၅ ခုနှစ်၊ မတ်လနောက်ပိုင်းကနေ စပြီး ပြန်လည်ထုတ်ပေးနေပြီ ဖြစ်တယ်လို့ ကြေညာထားပေမယ့် လက်တွေ့မှာတော့ အကန့်အသတ်နဲ့သာ ထုတ်ပေးနေတာ ဖြစ်တယ်လို့ သိရပါတယ်။
“အခွန်ဆိုလည်း အပြည့်အဝဆောင်ပြီး ပြန်လာကြတာပါ။ ခွင့်ရက်ပြည့်လို့ အလွယ်တကူ ပြန်ထွက်မရရင် အလုပ်ပါပြုတ်ရတာ။ အခုလည်း ဘဏ်ကနေ ငွေသွင်းရမယ်လို့ နောက်တမျိုး ထပ်ပြောပြန်ပြီ။ ငွေစာရင်းအမှတ် မှားသွင်းမိရင် ကတ်ဖိုးပါ ထပ်ဆုံးဦးမယ်။ အစကနေ ပြန်လုပ်ရင်တခါ အချိန်က ထပ်ကုန်ရဦးမယ်။ လွယ်နေတာကို ခက်အောင်လုပ်နေတာ” လို့ ခွင့်ပြန် အလုပ်သမားတယောက်က ပြောပါတယ်။
OWIC ကတ်ကို အရင်က နေ့တဝက်နဲ့အပြီး ပြုလုပ်ပေးခဲ့တာ ဖြစ်ပေမယ့် လက်ရှိမှာတော့ သုံးလလောက် အချိန်ပေးနေရတာကြောင့် ခွင့်ပြန် အလုပ်သမားတွေ အနေနဲ့ ဆုံးရှုံးနစ်နာမှုတွေ များစွာ ဖြစ်ပေါ်နေရတဲ့အတွက် OWIC ကတ်ကို တပတ်အတွင်း ရရှိအောင် ဆောင်ရွက်ပေးစေချင်တယ်လို့ ဆိုပါတယ်။
“အဲဒီကတ်ကိုပဲ ခွင့်ပြန်တွေကို လုပ်ရအောင် သေချာချပေးပါလို့ ပြောချင်တယ်။ တပတ်ကိုမှ မလေးရှား၊ စင်ကာပူ ၁၀ ယောက်၊ ၁၅ ယောက် ချပေးနေတာ။ ဒါတောင် အရင်အပတ်ကမှ စချတာ။ သူတို့ကြောင့် ခွင့်ပြန်တွေ ပြန်မတက်နိုင်လို့ အလုပ်ပြုတ်သူတွေ၊ လေယာဥ်လက်မှတ် ဆုံးရှုံးတဲ့သူတွေ အများကြီးပဲ” လို့ နောက်ထပ် အလုပ်သမား တယောက်က ပြောပါတယ်။
ဒါအပြင် လက်ရှိမှာ ရန်ကုန်လေဆိပ်ကနေ ထွက်ခွာခွင့် ပိတ်ပင်ခံရသူတွေ များပြားလာတာကြောင့် စင်ကာပူနိုင်ငံ Changi Airport Terminal 2 ရှိ Lost & Found ရုံးခန်းအနီးမှာ မြန်မာနိုင်ငံသားပိုင် ခရီးဆောင်အိတ်များစွာ ပိုင်ရှင်မဲ့ စုပုံနေတယ်လို့ သိရပါတယ်။
Changi လေဆိပ်မှာ မြန်မာလေကြောင်းလိုင်းတွေနဲ့ ရောက်ရှိလာတဲ့ ခရီးဆောင်အိတ် အမြောက်အမြားရှိနေပြီး အဲဒီအိတ်တွေဟာ ပြီးခဲ့တဲ့ ဇန်နဝါရီလ ၁၁ ရက်နေ့ကနေ ဖေဖော်ဝါရီလ ၆ ရက်နေ့အထိ ရက်စွဲပါရှိတဲ့ အိတ်တွေဖြစ်တယ်လို့ သိရပါတယ်။
ခရီးသည်တွေဟာ လေကြောင်းလိုင်းတွေမှာ Check-in ပြုလုပ်ပြီး ဝန်စည်စလယ်တွေ အပ်နှံပြီးတဲ့နောက် လူဝင်မှုကြီးကြပ်ရေး စစ်ဆေးရေးဂိတ်ကို ရောက်ရှိချိန် လေယာဉ်ပေါ်တက်ခွင့် တားမြစ်ခံကြရတာတွေ ရှိနေတယ်လို့ သိရပါတယ်။
ဒါကြောင့် လူတွေကျန်ရစ်ခဲ့ပေမယ့် အပ်နှံပြီးသား အိတ်တွေကတော့ လေယာဉ်နဲ့အတူ ပြည်ပကို ပါသွားခဲ့တာဖြစ်ကာ အခုလို ဖြစ်စဉ်တွေကြောင့် အဖိုးတန် အသုံးအဆောင် ပစ္စည်းတွေ ပြန်လည်ရရှိဖို့ ခက်ခဲတာအပြင် လေယာဉ်လက်မှတ်ခ၊ ဗီဇာခနဲ့ ပြင်ဆင်မှုစရိတ် ဆုံးရှုံးတာတွေလည်း ရှိနေတယ်လို့ သိရပါတယ်။
Photo – CJ
